Cerita Paskah dalam Dialek Kupang

POS KUPANG/AGUS SAPE MEMANGGUL SALIB -- Seorang pemuda memerankan tokoh Yesus Kristus saat memanggul salib dalam tablo Jumat Agung yang digelar Orang Muda Katolik Stasi St. Fransiskus Xaverius-Naimata, Kupang, Jumat (10/4/2009).

Pengantar
PASKAH tahun 2009 telah dirayakan oleh umat Nasrani di seluruh dunia. Dan, berbagai kisah sengsara Yesus hingga kebangkitanNya menjadi tema dalam bebagai perayaan Paskah.

Cerita tentang Yesus Kristus pun telah diterjemahkan dalam berbagai bahasa di dunia. Cerita tentang Yesus dalam bahasa Kupang pun kini bisa didapat oleh warga Propinsi Nusa Tenggara Timur (NTT). Berikut kutipan kisah tentang Yesus Kristrus.

Hak cipta 2007 untuk teks bahasa Kupang berada pada Unit Bahasa dan Budaya, Jl. Perintis Kemerdekaan, Kota Baru, Kupang, Nusa Tenggara Timur, 85228 Indonesia. Illustrasi oleh Dr. Farid Faadil. International Bible Society. Dipakai atas izin.



Carita So'al Paska
Kutipan dari Injil Markus Bahasa Kupang (1)

ITU waktu, kapala agama Yahudi dong pung bos-bos deng guru agama dong bacari akal ko mau tangkap sang Yesus deng diam-diam. Ko dong mau bunu sang Dia na. Ma dong ator siasat, bilang, "Tahan dolo! Kotong jang tangkap sang Dia capat-capat, tagal hari-hari bae su deka. Jang sampe orang banya dong nanti mangamok."


Dong ba'omong bagitu, tagal masi dua hari lai, orang Yahudi dong pung hari-hari bae, yang dong kasi nama 'Hari Paska' deng 'Pesta Roti Sonde Pake Bibit Roti'. Deng itu hari-hari bae, dong inga tempo dolu, waktu dong pung nene-moyang kaluar dari negri Masir.

Abis ju, ada satu dari Yesus pung ana bua dua blas orang tu, nama Yudas Iskariot. Dia kaluar pi cari kapala agama Yahudi dong pung bos-bos, ko mau jual buang sang Yesus kasi dong. Sampe di dong, ju dia kasi tau dia pung maksud. Waktu bos-bos dong dengar Yudas pung omong bagitu, ju dong san├čng mo mati.

Ju dong janji, bilang, "Kalo lu mau jual Yesus kasi sang botong, pasti botong bayar."
Ais Yudas kaluar, ju dia mulai cari akal ko mau kasi Yesus pi sang dong.

Itu hari jato di hari partama dari orang Yahudi pung hari-hari bae. Jadi, di itu hari, dong biasa bakar roti yang sonde pake bibit roti, deng dong ju potong domba. Ais ju, Yesus pung ana bua dong datang tanya sang Dia, bilang, "Papa! Ini hari ni, kotong pung hari bae Paska. Jadi, Papa mau botong pi sadia tampa pesta Paska di mana?"

Ais Yesus suru Dia pung ana bua dua orang, bilang, "Bosong pi lebe dolo di kota. Di sana, nanti bosong katumu deng satu laki-laki yang ada masa'a aer di satu kumbang kici. Bosong pi iko sang dia sa".

Nanti, kalo dia maso pi ruma mana, na, bosong pi iko sang dia di situ. Abis, bosong kasi tau sang itu tuan ruma, bilang, "Bapa! Botong pung Bapa Guru ada minta satu tampa, ko Dia mau pake bekin pesta Paska deng Dia pung ana bua dong.

Ais nanti itu orang kasi tunju satu kamar luas di lante atas. Dia su sadia langk'ap itu kamar. Cuma tenga bosong dua pi ko sadia makan di situ."

Ais dong dua jalan pi kota. Di sana dong dapa katumu deng samua yang Yesus su kasi tau memang sang dong. Ju dong sadia samua, ko Yesus dong makan pesta Paska di situ. Abis dong dua pi pange sang Yesus dong.

Waktu matahari su mulai tanggala'm, ju Yesus deng Dia pung ana bua dua blas orang dong pi di situ. Ais dong dudu ko makan sama-sama.

Waktu dong masi makan, ju Yesus angka ame roti satu balok, ko minta tarima kasi sang Tuhan Allah. Abis Dia bekin pica-pica itu roti, ju sorong kasi sang Dia pung ana bua dong. Ju Dia bilang, "Ini roti, Beta pung badan. Ame ko makan suda."

Abis itu, Dia angka ame gala's yang ada isi bua anggor pung aer. Dia ju minta tarima kasi sang Tuhan Allah. Ais Dia sorong kasi itu galas pi di Dia pung ana bua ko dong samua minum. Ju Dia bilang, "Ini anggor, Beta pung dara.

Dia nanti tatumpa ko kasi salamat banya orang. Ini dara jadi bukti ko kasi inga, bilang, apa yang Tuhan Allah su janji tu, memang sakarang ni su jadi. Naa, ame ko minum suda.

Dengar bae-bae dolo! Mulai dari ini malam, Beta su sonde minum bua anggor pung aer lai.
Sampe Beta pung Bapa di sorga dudu parenta, baru Beta minum lai."

Abis ju, dong manyanyi satu lagu ko puji sang Tuhan Allah. Tar·s, dong kaluar malam ko pi gunung Saitun.
Abis itu, Yesus dong jalan tar·s sampe di satu kab n di gunung Saitun, nama 'Getsemani'. Ju Yesus kasi tau sang dong, bilang, "Bosong dudu tunggu di sini, e'. Beta mau pi sambayang di sana."

Ju Yesus pange bawa sang Petrus, Yakobis, deng Yohanis, ko pi sama-sama deng Dia. Mulai dari itu waktu, ju Dia pung hati rasa susa deng sonde tana'ng.
Ais Dia maju lebe jao sadiki, ju Dia tikam lutut di tana ko sambayang, bilang, "Papa manis! Kalo Papa satuju, na, Beta sonde usa tanggong itu sangsara sampe mati macam bagini. Beta su tau memang, bilang, sonde ada yang Papa sonde bisa bekin. Jadi kalo bole, na, Papa angka buang jao-jao ini sangsara dari Beta. Ma jang iko Beta pung mau; biar iko Papa pung mau sa."

Abis ju, Dia kambali pi Dia pung ana bua tiga orang tu, ma dong ada tidor sonu. Ais Dia kasi bangun sang dong, ju Dia omong sang Petrus, bilang, "He, Pe'u! Lu tidor, ko? Beta di situ cuma sabantar sa, ma bosong sonde bisa bajaga sadiki ju! Goso bekin tara'ng lu pung mata dolo.

Ais bangun ko bajaga deng Beta! Bosong pung hati memang mau bekin yang bae, cuma bosong pung badan sonde kuat. Jadi, lebe bae bosong sambayang, ko kalo kana' coba'an, bosong sonde kala."

Abis Yesus pi sambayang satu kali lai. Dia minta ulang sang Tuhan, ko jang kasi tenga Dia pikol itu sangsara. Ais Dia datang kambali di Dia pung ana bua tiga orang tu. Ma dong su tidor ulang lai, te dong pung mata barat mo mati. Ais Dia kasi bangun ulang sang dong, ma dong sonde tau mau manyao, bilang, apa sang Dia.

Abis itu, Yesus kasi tenga sang dong ko pi sambayang yang katiga kali. Ais ju, dia kambali ko kasi bangun sang dong. Dia bilang, "Bosong masi tidor lai, ko? Cukup suda! Bangun! Te orang yang mau jual sang Beta, Manusia Tulen ni, su deka. Sakarang, dong su mau tangkap sang Beta, ko kasi pi orang jahat dong pung tangan. Ayo, bangun! Bukabosong pung mata ko lia coba pi sana dolo! Orang yang mau jual buang sang Beta tu, su datang. Mari ko kotong pi katumu sang dong!"

Waktu Yesus masi ba'omong bagitu, ju takuju sa, Yudas su dating deng orang bam-banya. Dong datang deng bawa kalewang kudung deng kayu kudung, ko mau tangkap sang Yesus. Dong bekin bagitu, iko parenta dari bos-bos Yahudi dong. Dong tu, andia kapala agama dong pung bos-bos, guru agama dong, deng tua-tua adat. Yudas su kasi sein memang sang dong, bilang,

"Bosong lia bae-bae! Sapa yang beta ciom, bosong tangkap ame sang Dia suda! Andia Dia tu, orang yang bosong cari!"

Jadi, waktu Yudas dong sampe di situ, ju dia langsung mangada sang Yesus. Abis dia togor, bilang, "Bapa Guru!"

Ju Yudas palo-ciom ame sang Dia. Tar·s, orang banya dong maju datang, ko tangkap sang Yesus. (bersambung)


Pos Kupang Minggu 19 April 2009, halaman 11

0 komentar:

Posting Lebih Baru Posting Lama Beranda