Cerita Paskah dalam Dialek Kupang (3)

Foto ilustrasi/
webshots.com

PATUNG YESUS
DI SAO PAOLO-
BRAZSIL
--
Patung setinggi
36 meter
ini merupakan salah
satu
patung tertinggi di
dunia.Masyarakat
Brasil mengangungkan
kebesaran Yesus
dengan
membuat patung
ini dan
menempatkan
di bukit paling
tinggi di Kota
Sao Paolo,
Brazil.



Pengantar
PASKAH tahun 2009 telah dirayakan oleh umat Nasrani di berbagai belahan dunia ini. Dan, berbagai kisah sengsara Yesus hingga kebangkitannya telah menjadi temah dalam bebagai perayaan paskah tersebut. Cerita tentang Yesus Kristus pun telah diterjemahkan dalam berbagai bahasa di dunia. Cerita tentang Yesus dalam bahasa Kupang pun kini bisa didapat oleh warga Propinsi Nusa Tenggara Timur (NTT). Berikut kutipan kisah tentang Yesus Kristrus

Carita So'al Paska
Kutipan dari Injil Markus Bahasa Kupang - (3)
Hak cipta 2007 untuk teks bahasa Kupang berada pada Unit Bahasa dan Budaya, Jl. Perintis Kemerdekaan, Kota Baru, Kupang, Nusa Tenggara Timur, 85228 Indonesia. Illustrasi oleh Dr. Farid Faadil. International Bible Society. Dipakai atas izin.

YESUS pung mati jato di hari Jumat. Dia pung beso, hari Sabtu, andia orang Yahudi dong pung hari sambayang. Waktu matahari su tanggala`m, Maria dari negri` Magdala, Maria yang laen tu (andia Yakobis pung mama), deng Salome, pi ba`li minya wangi, ko beso dong mau pi siram di Yesus pung mayat, iko orang Yahudi dong pung adat. Ais hari Minggu papagi sakali, ju dong tiga pi di itu kubur. Di tenga jalan dong ba'omong, bilang, "We! Nanti sapa yang bisa tolong kasi ondor itu batu be`sar dari kubur pung pintu tu? Kotong tiga sa pasti sonde kuat, ko itu batu be`sar mo mati na!"


Ma dong sampe di situ, ju dong dapa lia itu batu su taguling. Ais dong maso pi dalam itu kubur. Ma dong takuju mo mati, tagal dong dapa lia satu orang muda ada dudu di dong pung sabla` kanan, pake pakean puti mangkilat.

Ju itu orang muda kasi tau sang dong, bilang, "Bosong sonde usa taku! Beta tau bosong datang ko mau cari Yesus dari Nasaret, yang dong su kasi mati di kayu palang tu. Dia su sonde ada di sini lai, ko Dia su idop kambali na! Mari, ko bosong lia sandiri itu tampa yang dong taro Yesus pung mayat tu, su kosong."

Hari Minggu papagi tu, Yesus pi kasi tunju muka lebe dolo sang Maria dari Magdala, yang dolu Yesus parna` usir tuju setan dari dia pung diri. Dia lia abis sang Yesus, tar·s dia pulang ko pi kasi tau samua orang yang dolu iko sang Yesus. Dong masi bakumpul deng hati susa, deng dong pung aer mata jato inga Yesus pung mati tu.

Ais Maria kasi tau sang dong, bilang, "Akurang ko bosong masi susa? Sonde usa susa lai, te Yesus su idop kambali! Tadi ni, beta baru sa katumu sang Dia na!"

Ma dong samua manyao, bilang, "Weh! Lu omong kosong!"

Abis itu, Yesus pung ana bua dua orang bajalan pi satu kampong. Di tenga jalan ju, Yesus pi kasi tunju muka sang dong, ma Dia su jadi laen. Ma sonde lama te, dong ju kana`l sang Dia. Ais dong dua pulang pi kasi tau dong pung tama`n, bilang, "We! Bosong dengar dolo! Tadi ni, botong baru katumu deng Yesus di jalan!"

Ma dong pung tama`n dong samua manyao, bilang,"Weh! Bosong jang omong kosong bagitu!"

Abis ju, Yesus katumu deng Dia pung ana bua sabla`s orang, waktu dong ada dudu makan. Dia togor sang dong, bilang, "Weh! Bosong pung kapala batu lai! Orang su kasi tau sang bosong, bilang, dong su lia sang Beta deng dong pung mata biji sandiri, ma bosong sonde mau parcaya, "! Bosong bilang, dong samua omong kosong! Naa! Sakarang ni, Beta sandiri su datang. Beta memang su mati, ma sakarang ni, Beta su idop kambali! Naa, bosong lia sandiri sa. Jadi, sakarang bosong musti pi kuliling di ini dunya, ko pi kasi tau samua orang, Beta pung Carita Bae ni. Orang yang parcaya sang Beta, deng dapa sarani, nanti Tuhan Allah kasi salamat sang dia, ko dia dapa tenga tar·s deng Tuhan Allah di sorga. Ma orang yang sonde parcaya, nanti dia kanß hukum, deng Tuhan tola buang sang dia ko tenga tar·s di luar."

Abis ba'omong deng Dia pung ana bua dong, ju Tuhan Allah angka kasi nae sang Yesus pi sorga. Di situ, Dia jadi Tuhan Allah pung tangan kanan, ko dong dua dudu parenta sama-sama.(habis)


Pos Kupang Minggu 3 Mei 2009, halaman 11

0 komentar:

Posting Lebih Baru Posting Lama Beranda