Puisi-puisi Apu

Di Kebun
(Para Petani)

Di kabon katong cangkol
Trus kalo ada nasib, tanam
Jagung ko, ubi ko apa _ kol
Asal kalo bisa katong jang lapar
Mau pi mana lai?
Kabong itu sah nadi
Bawa darah idup

Tuk katong pung kaluarga
Kalo kabon dong su ke pabrik
Asap-asap di rumah makin sasak
Son bisa masak
Trus parampuan dong ju
Son bisa tenun
Dari mana dong dapa makan
Anak-anak lebih para lae
Tapi katong son bisa bilang
Iko deng bapa sah
Dong bisa mati capat
Abis dong son makan na
Mana dong bisa karja
Jadi, kabon abis,
Kaluarga ju abis
Eban, 2008


Doa Tukang Ojek

Tuhan, ke mana be pargi
Sasudah orang-orang dong be antar
Ada yang bayar pas
Ada yang kurang
Yang bayar lebe be sanang
Orang ini bae hati
Mana sonde, ko be jalan di angin-angin
Jaga ko jang oleng
Ini bukan ke oto
Ato bemo kota ko dong pung roda
Ampat bagitu
Paling-paling kas turun gas sah
Ma ini musti jaga kasaimbangan ju
Sadikit sah katong bisa talempar
Trus orang dong luka ko apa ko
Katong musti bayar lai
Salah-salah ju bisa masok panjara
Sapa suka mau pi itu tampa
Tagal angin sah
Ma be son ba-angin kalo dapa rejeki
Be mau buat apa deng limapuluh ribu
Ato kalo untung na seratus ribu
Beli bensin su sakitar limapuluh bagitu
Trus sator kira-kira seratus
Be musti utang lai
Jaga be o Tuhan
Sama ke be jaga orang di belakang
Ma kalo be di belakangMu?
Be paling sanang
Be jamin son oleng-oleng
Apalai Lu son parlu uang ke be
Uh...be ojek
Trus ke rumahMu
Katong turun trus
Tiba-tiba be son mau pulang
Tar tau kanapa
Itu su. Lu salalu bayar lebe
Liliba, Kupang, 2008

Pengiriman berbagai karya sastra dalam bentuk puisi dan cerpen melalui alamat ini: cerpen_puisi@poskupang.co.id


Pos Kupang Minggu 17 Mei 2009, halaman 6

0 komentar:

Posting Lebih Baru Posting Lama Beranda